今時今日唔會有人聽忠言架喇

金融花生│車公箴言一年驗證（言平） 上年鄉議局喺大年初二去車公廟，為香港求籤，求咗支第15籤中籤，「斧斤持以入山林，未得之時那處尋，損了良材失卻力，獻君留住待春臨」。 我唔係專業解籤，照字面睇，就係話山林啲樹都未成長好，你拎把斧頭去劈柴，一來搵唔到好樹，啲樹木明明畀啲時間就會成材，但而家夾硬去劈，結果無好結果，又嘥腳骨力，簡而言之就係「時機唔啱，唔好嘥氣」。 香港經濟之差，由小店零售食肆，大至金融，地產行業都感受到，簡直係一潭死水，最慘香港就係靠金融搵食。香港政府都唔可以話無做嘢，由減交易印花稅到撤辣，又喺各區搞夜繽紛，又熊貓經濟又物，我哋必須感謝政府有心去做，可惜絕大部分得個做字。 呢刻香港困境係前所未見，過去五年，新冠疫情內耗，中美競爭外損，問題遠超97年金融風暴、03年沙士、08年金融海嘯。作為每日都想解決問題嘅政府，梗係好想做啲嘢，但有時係咪做嘢就一定解決到問題呢？根據中史DSE課程，提及「西漢建立後，劉邦廢秦苛法，實施道家的無為而治，休養生息。減輕賦稅和徭役，釋放部分奴婢，抑制富商，限制土地兼併，並且獎勵開荒，使漢初經濟得到恢復」。 無為而治最重要 成段嘢幾個重點：無為而治、輕徭薄賦、獎勵開荒，當中以無為而治最重要，唔係叫政府乜都唔做，而係盡量唔好干預市場，盡量由佢自己運行，時機一到，自然「無為而無不為」。搞經濟同投資一樣，timing is everything ，喺一個跌緊嘅趨勢，掉更多錢積極做嘢都好易事倍功半。而家香港經濟咁差，香港政府可以諗下放開好多政策限制，由市場主導去發展，既然國外壓力越嚟越大，不如放開限制街市擺賣問題，慢慢由下而上培養返經濟動力。政府強項係調動資源去做佢想做嘅政策，而生產資源，從來唔係政府強項。而且財赤咁大，節流譬如減公務員人工政府唔肯（正常吖有邊個人願意減自己人工），開源如周街抄牌罰錢都不如免一免，管少啲，市場自有生存方式。而家差不多有一年去驗證車公忠告，再對照返政府過去一年工作，不得不佩服車公慧眼。 有時與其定硬性KPI，不如感受下Less is more嘅意思。更何況，政府官員定嘅KPI，有幾多同香港經濟同發展相關呢？實在好想知。 言平 Source: https://hk.finance.yahoo.com/news/%E9%87%91%E8%9E%8D%E8%8A%B1%E7%94%9F%E2%94%82%E8%BB%8A%E5%85%AC%E7%AE%B4%E8%A8%80%E4%B8%80%E5%B9%B4%E9%A9%97%E8%AD%89%EF%BC%88%E8%A8%80%E5%B9%B3%EF%BC%89-001551860.html 小政府大市場，40年前既成功，佢地唔會信架，只信自己