每次見到美心被「裝修」，我心裡面都有份違和感。
違和，係因為我清楚記得，喺不久之前，見過一份藍絲嘅商家杯葛名單，美心榜上有名，而且名列前茅。
成為被杯葛對象，源於「一群熱愛香港的美心集團員工」8 月 3 日喺連登出 post，附上橫跨集團內各食肆包括元氣、Starbucks 嘅員工証，高調響應 8.5 大三罷，爭取五大訴求。由於上傳員工証人數眾多，氣勢震撼，唔少傳媒轉載報導。
事隔兩個月，一個伍淑清，令美心換咗顏色，水洗都唔清。
現任美心集團主席及董事總經理伍偉國（下圖），同伍淑清係兩房人，應該叫佢做姑媽。有人見上周伍淑清仲高調接受內媒訪問，稱商界憂報復不敢發聲，懷疑呢位姑媽有心害另一房人，所以火上加油。華人家族生意不嬲複雜，我唔知內情，唔想作無謂揣測。
我反而偏向相信，伍淑清係我「藍絲攻略」中所寫嘅「實務愛國型」，真心愛國，年過七十，有錢有權，深信自己所講所想 100% 正確，所以鍾意噏乜就噏乜，仲為自己敢於發聲而自豪。
姑媽任性，係咪姪仔埋單？可惜，唔係。係姪仔嘅員工埋單。
美心成為眾矢之的，伍淑清最多每年收少啲股息，不痛不癢。反而伍偉國需要緊急應變，以維修對應裝修持續營運落去。但每周咁樣被裝修落去，生意必受重創。
咁邊個會最先受到影響？
答案係：一群熱愛香港的美心集團員工
有朋友問我，美心嘅公關災難有得救嗎？
唔容易救，但要救，公關上要做大動作，而唔係之前所出嗰種四平八正嘅聲明。
而整個處理嘅關鍵，落喺一條核心問題：美心是什麼？
美心係伍淑清的嗎？
定美心係伍偉國嘅呢？
定美心係怡和等股東嘅？
定美心係代表住集團上下大小員工嘅集體意志呢？
定美心係伍偉國嘅呢？
定美心係怡和等股東嘅？
定美心係代表住集團上下大小員工嘅集體意志呢？
一間小公司，老闆能代表一切。佢地挑選員工時，好有可能㨂同聲同氣嘅。
但一間好似美心咁有兩萬名員工嘅巨企，就等同於一個社會嘅縮影。當中唔同價值觀嘅人共冶一爐，冇話邊個代表邊個。而管理層嘅責任，就係尊重個人價值分歧嘅同時，導引員工一個共通嘅信念：好好服務香港市民。正如
Starbucks 創辦人 Howard Schultz 多年前被保守人士質詢，為何支持同志平權時所說：「The lens in which
we are making that decision is through the lens of our people. We employ
over 200,000 people in this company, and we want to embrace diversity.
Of all kinds.」
沒有藍黃，只有黑白。我一直有個近乎於天真嘅想法：香港本來冇我地想像或所見中咁分歧，只係政權希望透過劇化分歧去便利其管治。見到被裝修嘅美心，我就想到整個被政權裝修緊嘅香港。
我認識美心高層，多次忍唔住發訊息溫馨提示，希望佢地好好作回應，因為我內心深處，一直記著 8 月 3 日那「一群熱愛香港的美心集團員工」。
查看相片
或許有人會要求，既然同老細理念唔同，點解唔憤然劈炮？但現實係，依家商界叫苦連天，生意大不如前。我之前義務搞「反白色恐怖人才配對服務」，見受影響者不計其數，可惜僱主也自身難保，配對越來越困難。毅然請辭嘅代價，唔係個個付得起。
我對裝修有保留，並唔係想違反「核爆都唔割」呢個運動大原則，我只係唔想見到，當日嗰一班支持大罷工嘅美心同路人，會首先成為受害者，而我冇咁大嘅能力，逐一幫佢地配對到合適嘅工作。
美心是什麼？
對我來說，美心，絕對唔係伍淑清。
美心，係我樓下美心西餅嗰個永遠保持溫暖微笑嘅中年阿姐。
Source:
https://www.facebook.com/tsuiyuenmarketing/photos/a.347979951966656/2342846049146693/?type=3&theater
